A Song Called Hate

Hljómsveitin Hatari hafði starfað í jaðarsenu íslenskrar menningar frá árinu 2016 tiltölulega lítt þekkt. Það breyttist eftirminnilega árið 2019 þegar meðlimir hennar ákváðu að senda lagið Hatarið mun sigra í Söngvakeppni sjónvarpsins. Var þetta grín eða alvara hjá þessu and-kapítalíska BDSM teknóbandi? Var þetta brandari sem gekk of langt? Hataraæði greip þjóðina í Eurovisionanda en framlag þeirra var umdeilt og umtalað bæði hér heima fyrir og alþjóðlega. Hópurinn samanstóð af 13 manns þar sem hver hafði sitt hlutverk í gjörningnum og lagði í óvissuferð þann 2. maí 2019 sem enginn vissi hvernig myndi enda. Staðráðin í að taka sér dagskrárvaldið og setja Eurovision í pólitískt samhengi átakanna á milli Ísrael og Palestínu lögðu þau af stað með fyrirheit um óvæntar uppákomur. Við fylgjumst með þeim hitta ísraelska listamenn og samstarfi þeirra við palestínska tónlistarmanninn Bashar Murad og tískuhönnuðina í Trashy Clothing. Heimildamyndin segir sögu þessa ferðalags og fylgist með hvernig þau brutust í gegnum Eurovision maskínuna með gjörningnum og hvernig gjörningurinn breytti þeim sjálfum.
Myndin spyr spurninga um hlutverk listarinnar í samfélaginu og skoðar listina á bak við það að taka afstöðu.

Framleiðandi: Tattarrattat í samstarfi við RÚV